Haust 2011

Hæ.

Nú er orðið langt síðan mamma skrifaði hér inn. Í sumar var ég í Miðjunni tvo tíma á dag, þrjá daga í viku, en Miðjan er vistun fyrir börn með sérþarfir hér á Húsavík. Í sumar vorum við aðeins í Skóginum mínum, en það var ekkert gott veður hjá okkur í sumar. Í haust byrjaði ég í þriðja bekk og fékk nýja stuðninga. Ég er komin með þrjá stuðninga í stað tveggja áður vegna þess að ég sýni stundum þráhyggju gagnvart fólki. Það tók mig nokkrar vikur að venjast öllu þessu nýja en nú er ég mjög ánægð. Ég er komin með viðbót við stuðningsfjölskylduna mína, en það er Anna María sem var stuðningur minn í skólanum. Ég er í einkatímum í söng í skólanum hjá Hóffí og finnst það rosalega gaman enda er ég fljót að læra texta hvort sem þeir eru á íslensku eða ensku. Í nóvember kom loksins að því að ég fór á Greiningarstöðina. Ég hitti Dóru og Karitas frænkur mína og lék við þær. Eins hitti ég vini mína Björn Guðbert og Ásgeir Bjart en var orðin þreytt og vildi ekki leika. Hulda, stuðningurinn minn og Anna María, stuðningsfjölskyldan mín fóru með okkur á Greingarstöðina. Ég fór líka á "Sjónstöðina" og hefur sjónin mín lítið breyst, það sem ég sé á 6 metrum sjá aðrir á 12 metrum, sjónskerðingarnar eru eins. Ég fékk ný dökk filtergleraugu og valdi mér blá, ég þurfti ekki ný ljós gleraugu því mín eru ennþá fín. Ég fór á Heyrnar- og talmeinastöðina og þar gekk ekki nógu vel að fá mælingu, eins og venjulega, þeim fannst þó vinstra eyrað vera verra en það hægra og þarf ég að fara aftur til þeirra þegar þau koma næst á Akureyri. Við fórum líka í heimsókn á Tölvumiðstöð fatlaðra og fórum aðeins yfir málin. Svo fórum við í heimsókn í Klettaskóla (Öskjuhliðarskóla) og ég hitti fullt af krökkum, skoðaði flottu Smart töflurnar þeirra en svoleiðis væru sko flottar tövlur fyrir mig. Þau eru líka með svo flott skynjunarherbergi. Ég fékk að fara í heimsókn í nokkra bekki, þar á meðal til jafnaldra minna og það eru bara strákar. Þetta var rosalega gaman. Niðurstöðurnar frá Greiningarstöðinni setur mamma inná síðuna Ásrún Vala þegar þær koma formlega, en mamma og pabbi fengu svona það helsta þegar áður en við fórum heim. Ég fer reglulega í heimsókn í sveitina mína og finnst það rosalega gaman. Á föstudaginn var Verkstæðisdagur en þá er enginn skóli heldur ýmislegt föndur í öllum stofunum og ég labbaði á milli með mömmu en vildi ekkert föndra. Hins vegar vildi ég fara í Salinn en þar var selt kakó, vöfflur með rjóma og ýmislegt gott að borða, en mér finnst stundum svolítið gott að borða. Ég spyr á hverjum degi "Eru jólin í dag?" og "Má ég opna pakka í dag?" en það er víst ennþá nokkrir dagar í jólin. Mamma er búin að vera löt með myndavélina svo það eru ekki komnar inn nýjar myndir síðan í sumar, en vonandi bætir hún úr því. Endilega kvittið fyrir komuna og skiljið eftir komment.

Ásrún Vala kraftmikla.

Lególand.

Nú ætla ég að segja ykkur ferðasöguna mína.  Á miðvikudaginn lögðum við, ég, mamma og Sigrún Edda af stað áleiðis til Reykjavíkur. Við stoppuðum á Reykjum í Hrútafirði og tókum Hólmar Ben með en hann var þar með bekkjarfélögunum. Við komum eftir kvöldmat til Reykjavíkur og gistum hjá Mörtu frænku minni. Fimmtudeginum var eytt í búðum og mér fannst það gaman vegna þess að ég elska öll svona tæki sem eru í verslunarmiðstöðvunum.  Mömmu finnst þau reyndar hundleiðinleg þar sem erfitt er að ná mér úr þeim.  Það eru margir bílar í Reykjavík og þegar við vorum að keyra voru margir bílar á eftir okkur svo ég spurði mömmu af hverju þeir væru allir að elta okkur. Við fórum á skrifstofuna hjá Einstökum börnum og náðum í brottfaraspjöldin, miðana í Lególand og matarmiða. Mér var gefin flottur bakpoki. Ég var vakin kl. 02.30 og við héldum út á flugvöll Leifs Eiríkssonar. Við vorum komin með brottfararspjöld þannig að við gátum farið upp í vegabréfaeftirlitið. Íþróttaálfurinn kom svo og kvaddi okkur og sýndi okkur hvað hann var fimur. Ég vildi ekki taka þátt og ekki leyfa mömmu að taka mynd af mér með honum. Hann gaf öllum dvd disk. Við fórum svo í flugvélina og hún var rosalega flott. Hver farþegi var með sinn eigin skjá fyrir framan sig.  Og þetta átti sko við mig sem elska að fikta í öllu. Starfsfólkið í flugvélinni gaf alla vinnuna sína ásamt mörgum öðrum sem gerðu þessa ferð að veruleika fyrir Einstök börn. Við fengum buff og teygjur (armbönd) frá flugfélaginu. Þegar við lentum á Billund, beið rúta eftir okkur og fór með okkur í Lególand. Þar var æðislega gaman. Við skoðuðum fiskana og undirdjúpin, sáum fullt af flottum hlutum sem voru búnir til úr Legókubbum. Ég var svakalega hrifin af húsunum og lestunum sem keyrðu fram og aftur, vildi bara fara og leika mér en það mátti víst ekki. Við Hólmar Ben fórum líka að sulla í vatninu en þar voru fullt af rennibrautum og sjóræningjaskip. Við keyptum líka flott nestisbox handa mér sem er stór bleikur kubbur með nafninu mínu á. Við systur fengum okkur danskar pylsur og þær voru mjög góðar. Við fórum aftur í rútuna og í flugvélina. Mamma hélt að ég myndi sofna á heimleiðinni en ég ætlaði sko aldeilis ekki að missa af þessum flotta skjá fyrir framan mig. við lentum um níu og fórum síðan til Mörtu. Ég var nú ekkert á því að sofa og var alveg á útopnu. Sofnaði þó að lokum klukkan hálf tólf og var þá búin að vaka í 19 tíma. Síðan var ég vakin daginn eftir klukkan tíu og við Dóra frænka fórum að leika. Rétt fyrir tólf lögðum við af stað heim og vorum komin um hálf sex. Við græjuðum okkur og fórum svo í stúdentsveislu til Írisar uppáhaldsfrænku. Ég var í stuði og lét Huld og Írisi frænkur mínar stjana við mig eins og mér er einni lagið. Mamma er búin að setja inn myndir úr ferðalaginu, endilega kvittið fyrir komuna.

Ásrún Vala orkubolti.

Afmæli.

Hæ.

Í dag á ég afmæli, er orðin átta ára. Fjölskyldan mín gat nú ekki vakið mig með söng og pökkum vegna þess að ég vaknaði klukkan hálf sjö. En ég fékk pakka þegar ég kom fram og það var oft sungið fyrir mig. Svo borðaði ég amerískar pönnukökur með sýrópi og fór svo út að hjóla á nýja hjólinu mínu. Svo þurfti ég að fara í skólann. Í dag koma krakkarnir í bekknum mínum til mín í afmælisveilsu, eitthvað um tuttugu og tveir krakkar. Og svo er fjölskylduveislan á laugardaginn og þá kemur Sigþór Orri vinur minn. Mamma fór með mig í klippingu um daginn og var tekið töluvert af hárinu en nú ætla ég að prófa að safna toppi. Þegar Gunnella klippti mig þá komu svona miklir liðir í hárið mitt, rosalega flott. Ég er alltaf jafn ánægð í skólanum og Skólaselinu og við Sigþór Orri leikum okkur mikið saman í Skólaselinu. Það eru komnar inn nýjar myndir og koma sjálfsagt fleiri á næstu dögum. Takk fyrir þeir sem hafa kvittað.

Ásrún Vala afmælisprinsessa.

Hæ.

Ég fékk göt í eyrun fyrir jólin og þegar sú sem setti göt í eyrum spurði hvort ég vildi hvíta eða bleika steina stóð ekki á svari: hvíta. Ég hef haft það gott um jólin. Við erum alltaf heima hjá okkur á aðfangadagskvöld og síðan förum við til ömmu og afa á bakkanum. Á jóladag er hangikjöt hjá ömmu og afa á bakkanum. Á annan í jólum bjóðum við ömmu og afa á bakkanum og langömmu í mat til okkar. Svo á þriðja í jólum eða 27. desember á jólabarnið okkar hann Hólmar Ben afmæli og þá koma alltaf allir til okkar í kaffi, sérstaklega var gaman að hitta hann Matta frænda minn. Stóri bróðir átti tólf ára afmæli núna. Daginn eftir skruppum við til Akureyrar í snögga heimsókn til ömmu og afa og þegar við komum heim komu Björn Guðberg og Ásgeir Bjartur  í heimsókn með fjölskyldunni sinni, mér finnst þeir skemmtilegir. Við ætlum að vera heima í kvöld og borða kalkún og síðan fer stórfjölskyldan til Benda og fjölskyldu og sprengja gamla árið í burtu og fagna nýju ári með veislu. Það eru komnar inn nýjar myndir frá jólunum. Gleðilegt nýtt ár kæru vinir og takk fyrir það gamla. Endilega verið dugleg að kvitta fyrir komuna.

Ásrún Vala með göt í eyrum.

Hæ.

Ég er komin í jólafrí nema að ég er í gæslu þrjá daga í þessari viku frá 13-16. Ég er hætt á risperidón lyfinu mínu og er mjög ör, eiginlega á þrjú hunduð snúningum. Ég er búin að gera margt af mér eins og rífa jólakortin sem mamma var búin að skrifa, opna okkar jólakort (við opnum þau ekki fyrr en á aðfangadagskvöld). Mamma er búin að skrifa helling inná síðuna Ásrún Vala sem er í tenglunum hvers vegna þetta er svona. Ég vil bara fá pakka strax og opna þá, skil ekki hvað er langt í jólin. Við settum upp jólatréið í gær og ég er búin að velta því mikið fyrir mér hvað jólatréið var. Vona að þið hafið það gott um jólin og ekki gleyma að kvitta fyrir komuna.

Ásrún Vala jólabarn.

Hæ.

Alltaf líður langt á milli færslna hérna. Síðast sagði ég frá því að ég fengi miklar blóðnasir. Læknirinn sagði að ég væri með óþól gagnvart veðráttunni og ég fékk sterasprey (ofnæmis) og krem til að bera í nefið. Ég skánaði og fæ sjaldan blóðnasir núna. Ég hef farið til stuðningsfjölskyldunnar minnar og það gegnur vel, ég er mjög ánægð hjá þeim. Ég er búin að missa fjórar tennur og þessi týnsist líka, sennilega kyngt henni. Það gengur bara þokkanlega í skólanum og svo fer ég í gæslu eftir skóla, fjóra daga í viku. Mér finnst það rosalega gaman og þar hitti ég vin minn Sigþór Orra, við erum sko góðir vinir en hann er í fyrsta bekk. Á laugardaginn fórum við mamma og Hólmar Ben uppí Mývatnssveit, í Dimmuborgir og hittum jólasveinana. Það var sko gaman. Þeir gáfu okkur kerti og sungu fyrir okkur. Einn vildi endilega syngja lagið Ég er gordjúss, en hinir sögðu honum að það væri versti djús sem til væri, gor-djús. Þeir voru bara sex af því að jólakattarflensan er að herja á þá núna, þá vilja þeir bara láta klóra sér á magnaum og mala. Mamma er búin að setja inn nýjar myndir. Og endilega kvittið fyrir komuna.

Ásrún Vala tannlausa.

Hæ.

Allt gengur vel hjá mér, ég reyndar fæ svolítið mikið blóðnasir og þá rosalega miklar, þannig að ég á að fara til læknis í næstu viku og skoða þetta. Svo gerist slys í sundlauginni...það var settur alltof mikill klór í barnalaugina...og við vorum í sundkennslu og í tvo daga var barnalaugin með svona miklum klór sem hafði þau áhrif á mig að tærnar urðu bólgnar og með ljótum sárum, það blæddi úr tánum. Ég fór í sund þegar búið var að laga þetta og enn blæddi...mamma og pabbi sögðu að ég fengi ekki að fara í sund í nokkra daga til að athuga hvort þetta lagaðist ekki en enn blæddi úr tánum svo ég fékk ekki að fara meira í sundkennsluna. Nú var látin líða vika og þá fékk ég að fara í sund með Írisi minni og enn blæddi. Aftur leið vika og þá fékk ég að fara með Heiðrúnu Dóru minni, það blæddi ekki en tærnar voru rauðar og bólgnar...ljótt ef ég er komin með klórofnæmi út af þessu, mér sem finnst svo gaman að fara í sund. Ég er búin að sofa eina nótt hjá stuðningsfjölskyldunni minni og gekk mjög vel, fékk að keyra traktor og fara á hestbak. Við mamma skruppum í fjöruna í gær og ég sýndi henni álfaber (tók sand í lófann og sagði að þetta væru álfaber), þið getið séð myndir af því í september albúmi.

Ásrún Vala álfamær.